CHADEMA WAKITAKA KITI CHA UMEYA HALMASHAURI YA JIJI LA MBEYA

MBEYA.Mbunge wa Jimbo la Mbeya Mjini, Joseph Mbilinyi ‘Sugu’ (Chadema)  amesema kuwa  dhamira iliyopo kwa chama hicho ni kuhakikisha  kinatengeneza historia ya kukalia kiti cha Umeya ndani ya halmashauri  ya jiji la Mbeya.

Sugu alitoa kauli hiyo juzi kwa nyakati tofauti wakati akiwahutubia wakazi wa mitaa  mbalimbali ya jiji  alipofanya mikutano ya hadhara ya kampeni za chama hicho na kuwanadi wagombea nafasi za uenyekiti wa mitaa hiyo kupitia chadema.

“Hivyo uchaguzi huu wa serikali za mitaa  ni muhimu kwa chama chetu  kufanya vizuri ili kuweza kutimiza lengo la kuliongoza jiji la Mbeya” 

 Alisema kuwa ili  waweze kuchukua kiti cha umeya  chadema wanahitaji kuchukua mitaa isiyopungua 140 hadi 150, na kwamba cha hicho kikifanikiwa kuchukua idadi hiyo kitakuwa kimejiwekea mazingira ya  kushinda nafasi ya umeya katika halmashauri  ya jiji  hilo.

“Msingi wowote wa uongozi bora unatoka ngazi ya Serikali za mitaa, na wenyeviti wa mitaa ndio dira ya kuleta maendeleo  au kudumaza katika eneo husika  hivyo wananchi wasijefanya makosa wala kupuuzia uchaguzi huo na wahakikishe wanawachagua viongozi wenye uchu wa maendeleo”alisema 

Aidha alisema kuwa  amekuwa akikumbana na changamoto mbali mbali ikiwa ni pamoja na uwepo wa  vikwazo  kutoka kwa wenyeviti wa CCM, katika utekelezaji wa ahadi zake kwa wapiga kura wake.

“Mfano mzuri ni huu, kuna fedha za wananchi wa kata ya Nsalaga  ambazo nilizilielekeza kwa ajili ya ujenzi wa  mradi wa mabwawa ya  kufugia samaki lakini  wenyekiti wa mitaa ya kata hiyo wanapinga kupokea fedha hizo kwa sababu ambazo hazina msingi wowote”alisema .